യുഎഇ-യില്‍ കുട്ടികള്‍ക്ക്​ വാക്​സിനേഷന്‍ നിര്‍ബന്ധമില്ല - ആരോഗ്യമന്ത്രാലയം

by Dubai | 11-08-2021 | 350 views

ദുബൈ: മൂന്നിനും 15നും ഇടയില്‍ പ്രായമുള്ളവര്‍ക്ക്​ കോവിഡ്​ വാക്​സിനേഷന്‍ നിര്‍ബന്ധമില്ലെന്ന്​ ആരോഗ്യ, രോഗ​പ്രതിരോധ മന്ത്രാലയം അറിയിച്ചു. കുട്ടികള്‍ക്ക്​ രാജ്യത്ത്​ വാക്​സിനേഷന്‍ ആരംഭിച്ച പശ്ചാത്തലത്തിലാണ്​ മന്ത്രാലയം ഇക്കാര്യത്തില്‍ വ്യക്​തത വരുത്തിയത്​. സ്വയംസന്നദ്ധരായി വരുന്നവര്‍ക്കാണ്​ വാക്​സിന്‍ ലഭ്യമാക്കുക. 47 കേന്ദ്രങ്ങളിലായാണ്​ നിലവില്‍ മൂന്നു മുതല്‍ 17 വയസ്സുവരെയുള്ള കുട്ടികള്‍ക്ക്​ വാക്​സിന്‍ നല്‍കുന്നത്​.

ഷാര്‍ജയില്‍ 19 കേന്ദ്രങ്ങളിലും ഫുജൈറ 10, റാസല്‍ഖൈമ 9, അജ്​മാന്‍ മൂന്ന്​, ഉമ്മുല്‍ഖുവൈന്‍ മൂന്ന്​, ദുബൈ ഒന്ന്​ എന്നിങ്ങനെ കേന്ദ്രങ്ങള്‍ സജ്ജീകരിച്ചിട്ടുണ്ട്​. മൂന്ന്​ മുതല്‍ 11 വയസ്സുവരെയുള്ളവര്‍ക്ക്​ സിനോഫാമും 12 മുതല്‍ മുകളിലുള്ളവര്‍ക്ക്​ സിനോഫാമോ ഫൈസറോ ആണ്​ നല്‍കുക.

യു.എ.ഇ കഴിഞ്ഞ ആഴ്​ചയിലാണ്​ കുട്ടികളില്‍ സിനോഫാം ഉപയോഗത്തിന്​ അംഗീകാരം നല്‍കിയത്​. ക്ലിനിക്കല്‍ പരീക്ഷണത്തില്‍ സുരക്ഷിതമാണെന്ന്​ തെളിഞ്ഞതിന്‍റെ അടിസ്​ഥാനത്തിലാണ്​ കുട്ടികള്‍ക്ക്​ വാക്​സിന്‍ നല്‍കാന്‍ തീരുമാനിച്ചതെന്ന്​ ആരോഗ്യവകുപ്പ്​ നേരത്തെ വ്യക്​തമാക്കിയിട്ടുണ്ട്​. ഈ വര്‍ഷം അവസാനത്തോടെ രാജ്യത്തെ മുഴുവന്‍ യോഗ്യരായവര്‍ക്കും വാക്​സിന്‍ നല്‍കലാണ്​ അധികൃതര്‍ ലക്ഷ്യമിടുന്നത്​.

Lets socialize : Share via Whatsapp